Samkomulag stjórnvalda og skilanefndar Kaupþings undirritað

4.9.2009

Íslensk stjórnvöld og skilanefnd Kaupþings hafa undirritað samning um uppgjör vegna eigna sem færðar voru úr Kaupþingi yfir í Nýja Kaupþing í október s.l. og er hann í samræmi við samkomulag sem kynnt var 20. júlí s.l. Eins og tilkynnt var þann 14. ágúst s.l. hefur ríkissjóður nú veitt Nýja Kaupþingi eigiðfé í formi ríkissskuldabréfa upp á 72 milljarða króna. Bankinn stendur þar með á traustum fjárhagslegum grunni með 12% eiginfjárhlutfall.

Samningurinn felur í sér, líkt og tilkynnt var þann 20. júlí s.l., að skilanefnd Kaupþings, að undangengnu samráði við kröfuhafa, á þess kost fram til 31. október n.k. að eignast 87% hlutafjár í Nýja Kaupþingi. Þar með yrði hlutur íslenska ríkisins 13% og stór hluti eiginfjárframlags þess gengi til baka. Nýti kröfurhafar sér ekki þennan kost mun íslenska ríkið áfram verða eigandi bankans en kröfuhafar munu þó hafa kauprétt á allt að 90% hlutafjár í bankanum á árunum 2011 til 2015 á kjörum sem tryggja ríkinu eðlilegt endurgjald fyrir fjárfestingu sína í bankanum.

Fréttatilkynningu fjármálaráðuneytisins má einnig nálgast hér.

Til baka, Senda grein, Prenta greinina