Skjót viðbrögð skipta sköpum í svikamálum
Heiðrún Jónsdóttir, framkvæmdastjóri SFF, segir nýjan veruleika blasa við þegar kemur að öryggismálum fjármálafyrirtækja hér á landi sem og erlendis. Gervigreind setji mark sitt á árásir skipulagðra glæpahópa og varnir gegn þeim.
Heiðrún var til viðtals í kvöldfréttum Sýnar í gærkvöldi. Tilefnið voru fréttir af manni sem hagnýtti sér villu í kerfi Arion banka til að hafa af bankanum 160 milljónir króna. Maðurinn hefur verið handtekinn og mikill meirihluti fjármunanna hefur verið endurheimtur, eða um 95 prósent.
Árásir og varnir eflast
Í viðtalinu ræddi Heiðrún almennt um svik og svikavarnir, sem hafa sjaldan verið mikilvægari en nú, þegar tækninni fleygir fram á miklum hraða.
„Í sjálfu sér höfum við alltaf áhyggjur af öllum vörnum og svikavörnum, hvort sem það eru netárásir eða aðrar árásir. Við erum með mjög öflugt teymi innan bankanna og kerfisins í heild sem er í öflugu samstarfi erlendis frá til að koma í veg fyrir svik,“ segir Heiðrún.
Hún nefnir gervigreindina í þessu samhengi, sem setji mark sitt á öryggismál innan fjármálafyrirtækja.
„Gervigreindin er að hjálpa mjög mikið til, sérstaklega í vörnum. Þessir skipulögðu hópar og einstaklingar kunna líka að nota gervigreindina. Menn bregðast fljótt við, því þetta eru ekki einhverjir krúttlegir krakkar að leika sér í tölvum. Þetta eru skipulögð glæpasamtök, oft og tíðum. Ef þú ert að tala um skipulagða glæpahópa þá eru þeir um allan heim en þeir eru líka hér á landi, það er alveg þannig. Við þurfum að vera sífellt á varðbergi og alltaf á tánum. Þessar aðferðir breytast sífellt og tæknin verður betri og betri.“
Fólk taki ekki við grunsamlegum fjármunum
Mikilvægt sé að bregðast hratt við þegar grunur vakni um fjársvik.
„Ef fólk verður vart við eitthvað undarlegt þarf að hafa samband um leið, við bankann sinn og lögreglu. Þessir aðilar skilja eftir sig rafræn spor. Það er auðvelt að rekja fjármunina en það þarf að gera það strax, bæði til að frysta þá og koma í veg fyrir að þeir séu teknir út og þeir hverfi.“
Þá sé gott að hafa í huga að glæpamennirnir reyni oft að koma illa fegnu fé í skjól hjá þriðja aðila, sem ekki endilega er meðvitaður um uppruna fjármunanna. Þeir flytji svo peningana áfram og þannig er reynt að koma fjármunum undan.
„Ég vil beina því til almennings að ef einhver fær beiðni um að vera að nota bankareikninginn til að geyma illa fengið fé, þá þarf að passa sig á því til að verða ekki hlutdeildarmaður í broti.“
Viðtalið í heild má sjá í spilaranum hér að neðan.
