Enn hærri skattar, fyrir hvern? - Samantekt og upptaka

Samtök fyrirtækja í fjármálaþjónustu stóðu þann 9. júní að fundi um boðaða skattahækkun stjórnvalda á fyrirtæki í fjármálageiranum undir yfirskriftinni, „Enn hærri skattar, fyrir hvern?“. Fundurinn fór fram í Veröld – húsi Vigdísar.

Skattahækkun á fjármálafyrirtæki var boðuð í fjármálaáætlun fjármála- og efnahagsráðherra fyrir árin 2027 til 2031. Ekki hefur verið upplýst um eðli hennar eða umfang með tilheyrandi óvissu og ófyrirsjáanleika.

Á fundinum kynnti Dr. Gunnar Haraldsson, stofnandi Intellecon, niðurstöður samantektar sinnar um rekstrar- og skattaumhverfi fjármálaþjónustu á Íslandi og velti upp mögulegum áhrifum af boðaðri skattahækkun. Meðal þess sem kom fram í máli Gunnars var að ekkert benti til þess að arðsemi íslenskra banka væri umfram það sem gengur og gerist í öðrum atvinnugreinum eða hjá erlendum bönkum. Þá benti Gunnar einnig á að skattlagning á íslensk fjármálafyrirtæki væri þegar vel umfram það sem tíðkast í öðrum atvinnugreinum hér á landi eða hjá bönkum í samanburðarlöndum Íslands.

Benedikt Gíslason, bankastjóri Arion banka, fjallaði einnig um skattamál, hreyfanleika á bankamarkaði, eigið fé og vaxtamun. Benti hann meðal annars á að eigið fé íslenskra banka væri hlutfallslega töluvert meira en hjá kerfislega mikilvægum bönkum á Norðurlöndum, auk þess sem arðsemi íslenskra banka væri minni en gengur og gerist í Evrópu og á öðrum Norðurlöndum. Margt jákvætt hefði gerst síðustu árin. Hreyfanleiki neytenda væri mikill, vaxtamunur viðskiptavina mældist lítill í evrópskum samanburði og skilvirkni hefði aukist.

‍

‍

Í fyrri pallborðsumræðum ræddi Íris Björk Hreinsdóttir, yfirlögfræðingur SFF og fundarstjóri á fundinum, við Daða Má Kristófersson, fjármála- og efnahagsráðherra, Guðrúnu Hafsteinsdóttur, formann Sjálfstæðisflokksins, Jón Guðna Ómarsson, bankastjóra Íslandsbanka, og Þorstein Víglundsson, forstjóra Hornsteins og formann Samtaka iðnaðarins.

‍

‍

Fyrir umræðurnar varpaði Íris því út í salinn hvernig umrædd skattahækkunaráform samræmdust öðrum markmiðum stjórnvalda líkt og sjá má á myndinni hér fyrir neðan:

Í kjölfar fyrri pallborðsumræðnanna fjallaði Tómas Brynjólfsson, varaseðlabankastjóri fjármálastöðugleika, um eigið fé banka og seðlabanka, eiginfjárkröfur og óvaxtaberandi bindiskyldu út frá sjónarhóli Seðlabankans. Þar fór Tómas meðal annars yfir að mikið eigið fé íslensku bankanna réðist meðal annars af kerfislegu mikilvægi þeirra auk þess að útskýra hvers vegna bankinn hefði lagt óvaxtaberandi bindiskyldu á viðskiptabankanna.

‍

‍

Fundinum lauk með öðrum pallborðsumræðum. Þar ræddi Ingvar Haraldsson, greininga- og samskiptastjóri SFF, við Örnu Láru Jónsdóttur, þingmann Samfylkingarinnar og formann efnahags- og viðskiptanefndar, Nönnu Margréti Gunnlaugsdóttur, þingmann Miðflokksins, Hreiðar Bjarnason, framkvæmdastjóra fjármála hjá Landsbankanum, og Þórð Pálsson, forstöðumann fjárfestinga hjá Sjóvá.

‍

‍

Fundurinn var vel sóttur og á honum sköpuðust líflegar umræður þar sem andstæð sjónarmið komu fram. SFF þakka þátttakendum og gestum fyrir komuna á fundinn.