„Eftir þetta verðum við með sjöfalt hærri skatta“

Heiðrún Jónsdóttir, framkvæmdastjóri Samtaka fyrirtækja í fjármálaþjónustu, ræddi boðaða hækkun skatts á fjármálafyrirtæki í Síðdegisútvarpinu á Rás 2 í gær. Þar sagði hún vonbrigði að ríkisstjórnin hygðist hækka sértækar álögur á banka. Gert er ráð fyrir 75% hækkun á skatti á skuldir fjármálafyrirtækja í nýkynntu fjárlagafrumvarpi fjármála- og efnahagsráðherra.

Langhæstu skattar Vestur-Evrópu

Sértækir skattar á fjármálafyrirtæki hér á landi séu þegar þeir hæstu í Vestur-Evrópu, með þó nokkrum mun. Hér á landi eru þrír sértækir skattar lagðir á fjármálafyrirtæki, á meðan ekkert samanburðarlandanna er með fleiri en tvo, og sum engan.

„Fyrir þetta vorum við með fimmfalt hærri sértækan skatt en okkar nágrannaríki. Eftir þetta verðum við með sjöfalt hærri skatta,“ sagði Heiðrún og vísaði þar til greiningar KPMG fyrir SFF, sem leiddi í ljós að íslensk fjármálafyrirtæki búa við fimmfalt hærri sértæka skattlagningu en meðaltalið í Vestur-Evrópu. Skattarnir eru þrefalt hærri en á Spáni, sem er með næstmestu skattlagninguna.

„Það er hætta á því að samkeppnishæfni okkar verði verri, og nokkuð augljóst þegar svona byrðar eru settar á.“

Sólarlagsákvæði mikilvægt

Þá benti Heiðrún á að rúmt ár sé síðan ríkið seldi rúmlega 30 þúsund Íslendingum um 45% hlut í Íslandsbanka, án þess að gefa til kynna að skattahækkanir væru í farvatninu.

„Það er ekkert langt síðan ríkið var að selja hlut sinn í Íslandsbanka. Það var hvergi minnst á að það væri stutt í skattahækkun á þessum tíma.“

Ef á annað borð eigi að hækka skattana vegna tímabundinna aðstæðna liggi beinast við að tímabinda skattana til samræmis við það.

„Annað sem er mjög mikilvægt og við höfum líka reynt að koma að hjá ríkinu er að þetta verði skattur með sólarlagsákvæði. Í staðinn fyrir að hann verði settur á og gildi þar til hann er afnuminn þá yrði hann settur á og gilti í eitt eða tvö ár. Ef sitjandi ríkisstjórn vill framlengja þá þyrfti að gera það með sérstökum lögum.“

Heiðrún nefndi einnig að ófyrirsjáanleiki í skattlagningunni væri ekki til þess fallinn að auka samkeppnishæfni Íslands.

Eignarhaldið að stórum hluta hjá almenningi

Heiðrún benti einnig á að almenningur er meirihlutaeigandi bankanna, í gegnum eignarhald ríkissjóðs á Landsbankanum og eignarhald lífeyrissjóða í öðrum bönkum, auk þess sem stór hluti  almennings á beinan eignarhlut í bönkunum. Þar að auki sé almenningur einn stærsti viðskiptavinur íslenskra banka. Því hljóti áhrifin af skattahækkuninni á almenning að koma fram með einum eða öðrum hætti.

„Ef við horfum á markmiðið um hallalaus fjárlög þá hafa stjórnvöld ekki sýnt fram á að þetta sé skilvirkasta leiðin til þess, nema síður sé. Jafnframt vinnur frekari skattlagning gegn öllum öðrum markmiðum ríkisstjórnarinnar. Það eru ekki bara hallalaus fjárlög sem þau ættu að horfa til. Þau eru að tala um að það eigi að efla samkeppnishæfni og laða að erlenda fjárfesta. Það er ekki gert með þessum hætti,“ sagði Heiðrún.

Samtök fyrirtækja í fjármálaþjónustu standa fyrir opnum fundi, mánudaginn 14. september, um fjármögnunarumhverfi hér á landi og skattbyrði íslenskra fjármálafyrirtækja. Hér má nálgast frekari upplýsingar og skrá sig á fundinn.