Athygli vakin á nauðsyn fjármálalæsis

Mennta- og barnamálaráðuneytið kynnti áform um breytingar á námsmatshluta aðalnámskrár grunnskóla. SFF nýttu tækifærið og komu ábendingum á framfæri er vörðuðu hagsmunamál sem samtökin hafa beitt sér fyrir í lengri tíma.

SFF hafa í rúman áratug lagt áherslu á að bæta fjármálalæsi almennings, en það hafa samtökin t.a.m. gert með stofnun og starfrækslu fræðsluvettvangsins Fjármálavits. Samtökin settu Fjármálavit á laggirnar árið 2014 og hafa frá árinu 2017 staðið að rekstri vettvangsins með stuðningi frá Landssamtökum lífeyrissjóða.

Á undanförnum árum hafa SFF reglulega látið framkvæma kannanir á fjármálalæsi Íslendinga, en í apríl 2026 voru birtar niðurstöður úr könnun sem Gallup framkvæmdi fyrir samtökin fyrr á árinu. Niðurstöður könnunarinnar sýndu að flestir aðspurðra, eða rúmlega 81%, töldu fólk eiga að læra um peninga og fjármál í grunnskólum, en aðeins 12,3% svarenda sögðust hafa fengið slíka fræðslu í grunnskóla. Í könnuninni var jafnframt leitað svara við því hversu miklu eða litlu máli fólk teldi skipta að fjármálalæsi verði gert að skyldufagi í grunnskólum landsins. Yfirgnæfandi meirihluti þeirra sem tóku afstöðu, eða um 91,7% sögðust telja það skipta miklu máli, en aðeins um 3,1% töldu litlu eða engu máli skipta hvort fjármálalæsi yrði gert að skyldufagi í grunnskólum eða ekki.

Samtökin hafa átt gott samtal við stjórnvöld og aðra hagaðila varðandi innleiðingu á kennslu fjármálalæsis og vilja með umsögninni leggja áherslu á að fjármálalæsi verði gert að skyldufagi í grunnskólum og ítreka mikilvægi þess að efling fjármálalæsis meðal íslensks almennings haldi áfram.