Umsögn SFF um frumvarp til laga um varfærniskröfur til verðbréfafyrirtækja

Samtök fyrirtækja í fjármálaþjónustu (SFF) vísa til frumvarps til laga um varfærniskröfur til verðbréfafyrirtækja og jafnframt til umsagnar um drög frumvarpsins, sem samtökin skiluðu í Samráðsgátt stjórnvalda þann 12. febrúar sl. Í fyrri umsögn gerðu SFF athugasemdir við gildistökuákvæði frumvarpsdraganna, en gert var ráð fyrir að lögin tækju þegar gildi eftir birtingu þeirra. Samtökin lögðu til að gildistöku yrði frestað í þeim tilgangi að verðbréfafyrirtækjum gæfist nægt svigrúm til aðlögunar að breyttum kröfum. Frumvarpið gerir nú ráð fyrir gildistöku þann 1. september 2026.

Þrátt fyrir að skref hafi verið tekið í rétta átt telja SFF að fyrirtækjum verði að gefast raunhæft svigrúm til að innleiða breytingar í starfsemi sína, breyta kerfum, verklagi, uppfæra skjöl og eiga raunhæfa möguleika á því að leita sér ráðgjafar, telji þau þörf á því. Telja SFF því raunhæft að gildistaka verði í fyrsta lagi um áramótin, svo tryggja megi fyrirtækjum raunhæfan möguleika á því að innleiða breytingarnar í starfsemi sína.

SFF hafa ítrekað bent á að sköpum skipti fyrir samkeppnishæfni íslensks fjármálamarkaðar að ekki sé gengið lengra en þörf er á við innleiðingu evrópsks regluverks á fjármálamarkaði. Í fyrri umsögn vísuðu samtökin m.a. til ábendinga, sem samtökin skiluðu til starfshóps gegn gullhúðun (blýhúðun) EES-reglna og vöktu sérstaka athygli á ábendingum er vörðuðu þær ströngu reglur sem gilda um breytileg laun (kaupauka) hér á landi.

Strangari reglur en í samanburðarlöndunum geta haft neikvæð áhrif á samkeppnishæfni og rekstrarskilyrði eftirlitsskyldra aðila (m.a. hvað varðar sveigjanleika í rekstri). Benda má á að ásamt Hollandi hefur Ísland verið það Evrópuríki sem gengið hefur hvað lengst við að hefta kaupaukagreiðslur fyrirtækja á fjármálamarkaði. Hollendingar hyggjast nú ganga í takt við önnur ríki og afnema að verulegu leyti sínar ströngu reglur m.a. með það fyrir augum að laða að og halda í öflugt starfsfólk á fjármálamarkaði og hlúa að samkeppnishæfni Hollands

SFF álíta rétt að þær reglur verði samræmdar gildandi reglum í helstu samanburðarríkjum Íslands og ítreka ábendingu úr fyrri umsögn um að taka þurfi ákvæði íslenskrar löggjafar um breytileg starfskjör til endurskoðunar, þvert á tegundir fjármálafyrirtækja.

Að lokum benda samtökin á að við breytingar á löggjöf skuli almennt gæta að því að blýhúðun eigi sér ekki stað. Þetta á sérstaklega við þegar innleiddar eru eins flóknar og tæknilegar gerðir líkt og hér um ræðir. Jafnframt er nauðsynlegt að horfa til smæðar Íslands og mögulegra leiða til einföldunar á löggjöf og framkvæmd á fjármálamarkaði.