Umsögn um frumvarp til laga um varfærniskröfur til verðbréfafyrirtækja

Samtök fyrirtækja í fjármálaþjónustu (SFF) hafa skilað efnahags- og viðskiptanefnd Alþingis umsögn um frumvarp til laga um varfærniskröfur til verðbréfafyrirtækja. Frumvarpið felur í sér innleiðingu á evrópsku regluverki og var áður lagt fram á síðasta löggjafarþingi, en náði þá ekki fram að ganga.

Í umsögninni leggja SFF sérstaka áherslu á að ekki verði gengið lengra en nauðsynlegt er við innleiðingu evrópsks regluverks. Samtökin telja jafnframt tímabært að endurskoða strangar takmarkanir á breytilegum starfskjörum starfsfólks fjármálafyrirtækja hér á landi.

Íslenskar reglur meðal þeirra ströngustu í Evrópu

SFF gera athugasemdir við að ekki sé nýtt það svigrúm sem evrópska regluverkið veitir til aukins sveigjanleika í breytilegum starfskjörum. Samkvæmt frumvarpinu verða kaupaukar starfsmanna þeirra verðbréfafyrirtækja sem falla undir umræddar takmarkanir áfram bundnir við 25% af föstum starfskjörum, þrátt fyrir að evrópska tilskipunin kveði ekki á um slíkt fast hámark.

Samtökin benda á að íslenskar reglur séu strangari en í þeim ríkjum sem Ísland ber sig saman við. Ísland og Holland hafi verið meðal þeirra Evrópuríkja sem gengið hafa lengst í takmörkunum á kaupaukagreiðslum. Hollendingar hafi hins vegar nýverið rýmkað reglur sínar með það að markmiði að auka samkeppnishæfni og laða að hæft starfsfólk.

SFF telja að strangar takmarkanir á breytilegum launum geti dregið úr sveigjanleika í rekstri og aukið fastan launakostnað fyrirtækja. Breytileg starfskjör geti hins vegar gert fyrirtækjum kleift að tengja hluta launakostnaðar m.a. við afkomu og árangur.

Samtökin leggja jafnframt áherslu á að regluverk fjármálamarkaðarins hafi tekið miklum breytingum frá árinu 2008, meðal annars hvað varðar áhættustýringu og eftirlit. Því sé mikilvægt að horfa til þess hvernig breytileg starfskjör geti stuðlað að ábyrgri áhættutöku og verðmætasköpun til lengri tíma.

Tryggja þarf nægan tíma til aðlögunar

SFF ítreka jafnframt fyrri athugasemdir um gildistöku frumvarpsins og leggja til að henni verði frestað svo verðbréfafyrirtækjum gefist nægur tími til að laga starfsemi sína að nýjum kröfum. Mikilvægt er að fyrirtækjum sé tryggður raunhæfur tími til aðlögunar að nýjum lagakröfum, þannig að þau geti undirbúið og innleitt nauðsynlegar breytingar á starfsemi sinni með skipulegum og ábyrgum hætti.

Að lokum árétta SFF mikilvægi þess að forðast blýhúðun (gullhúðun) við innleiðingu evrópsks regluverks. Taka þarf tillit til smæðar íslenska markaðarins og leita leiða til að einfalda löggjöf og framkvæmd hennar, án þess að gengið sé lengra en þörf er á.