Kallað eftir auknu samráði og áherslu á fjármálalæsi í menntastefnu

Samtök fyrirtækja í fjármálaþjónustu (SFF), Samtök atvinnulífsins (SA), Samtök verslunar og þjónustu (SVÞ) og Sjálfstæðir skólar hafa skilað sameiginlegri umsögn um drög að þriðju aðgerðaáætlun menntastefnu til ársins 2030.

Samtökin fagna áherslu stjórnvalda á grunnfærni, gæði kennslu og mælanlegan árangur en telja mikilvægt að skerpa á einstökum aðgerðum og tryggja markvisst samráð við atvinnulífið við mótun, framkvæmd og eftirfylgni áætlunarinnar.

Í umsögninni er meðal annars lögð áhersla á að:

• Tryggja reglulegt og markvisst samráð við atvinnulífið svo menntakerfið geti betur mætt breyttri hæfniþörf vinnumarkaðarins.

• Gera fjármálalæsi að skyldufagi og samþætta fjármálafræðslu aðgerðum um eflingu grunnfærni, þróun námsgagna og starfsþróun kennara.

• Setja skýr og mælanleg markmið um árangur nemenda og tryggja markvissa eftirfylgni.

• Efla iðn- og starfsnám og tryggja að námsframboð taki mið af þörfum atvinnulífsins.

SFF hafa einnig skilað sérstakri umsögn um þriðju aðgerðaáætlun menntastefnu til 2030. Þar leggja samtökin sérstaka áherslu á að fjármálalæsi verði gert að skyldufagi í grunnskólum, að mótuð verði landsstefna um fjármálalæsi og að sett verði skýr og mælanleg markmið um árangur fjármálafræðslu.

Lesa má ítarlegri umsögn SFF hér.